Keppendafundur verður haldinn á miðvikudaginn 23.05.2012. Kl 18:30 hjá
bifreiðaumboðinu BL, Sævarhöfða 2.
Öllum keppendum er boðið til kynningarfundar n.k. miðvikudag og á sama
tíma er keppendum boðið að koma með hjól, hjálm og pappíra til skoðunar.
Það er um að gera að nýta sér þetta til að lækka stressfaktorinn þegar
kemur að keppninni. Þeir sem ganga frá skoðun og skráningu fá einnig
úthlutað límmiða-kittinu með keppnisnúmerinu.
Skoðunin verður opin til kl. 20:00.
ATH! þeir sem ekki hafa greitt keppnisgjaldið hafa ekki keppnisrétt.
Endilega ef þú átt eftir að greiða gjaldið að ganga frá því á
miðvikudaginn.
Sjáumst kát!
Aðrar mikilvægar upplýsingar - Lesist vel!
Það er mikið spurt um hvaða pappíra þarf að hafa með sér í skoðun.
Í raun er bara nóg að skila inn “Þátttökuyfirlýsingunni”. (Hún verður
tiltæk við skráningu & skoðun).
Hver og einn þarf að skila inn undirritaðri yfirlýsingu (+ undirritun
forráðamanns ef keppandi er yngri en 18 ára.).
Í þessari yfirlýsingu kemur fram að undirritaður staðfesti að hjólið
sem hann notar í keppninni sé löglegt í alla staði (tryggt & skoðað).
Einnig ábyrgist keppandi með undirritun sinni að fylgja öllum reglum
keppninnar og fl. (frekari upplýsingar á www.msisport.is ).
Það er því rétt að ítreka það við keppendur að lesa vel yfirlýsinguna –
það fylgir því mikil ábyrgð að undirrita slíka yfirlýsingu.
Að taka með sér skráningarplötu og/eða tryggingarpappíra er fínt – en
það er í raun ekki hlutverk keppnishaldara að fylgjast með því hvort
fólk er að fara að landslögum varðandi keppnistækin.
MUNIÐ - Ábyrgðin liggur öll á herðum keppandans í þessum efnum!
Auðvitað ætlar enginn að lenda í slysi – en þau verða nú samt!
Við slys þurfa hlutaðeigandi að standa skil á sinni ábyrgð í því.
Enginn vill standa frammi fyrir því að vera réttindalaus í slíkri stöðu.
Óskráð, óskoðað eða ótryggt hjól gæti sett viðkomandi í verulega slæma
stöðu.
Varðandi þessi tryggingarmál má benda keppendum á það, að sum
tryggingafélög fara fram á að keppandi kaupi sérstakan keppnis-viðauka.
Í því verður hver að skoða sína þörf fyrir sig.
SKOÐUN FYRIR KEPPNI:
Keppnishaldari fer yfir keppnishjól fyrir keppni. Það er gert til að
tryggja að ekki séu einhverjir vankantar á keppnistækinu sem gætu valdið
slysum og eins til að fylgjast með því að hjól séu rétt merkt.
Þó hjól hafi verið skoðað samkvæmt umferðarlögum, þá gæti t.d.
handfang, standpetali eða plast hafa brotnað við síðustu notkun og
oddhvassar brúnir myndast. Slíkt þarf að vera búið að laga til að fá að
taka þátt í keppni. Eðlilega þurfa bremsur að virka, teinar og gjörð að
vera í lagi, ásamt því að hjólalegur séu ekki áberandi lélegar.
Hjól þarf að vera áberandi merkt, með réttu keppnisnúmeri. Ætti ekki
að vera vandamál núna þar eð límmiðarnir fylgja með skráningunni.
Einnig þarf keppandi að taka með sér hjálminn til skoðunar. Marðir eða
sprungnir hjálmar eru ekki leyfilegir.
Það er um að gera að fara vel yfir þetta svo ekki komi til útilokunnar
frá keppni.
Kveðjur
Keppnisstjórn
